Бразилецот Родриго Силва де Гоес, офанзивец на Реал Мадрид, јасно ги демантираше тврдењата за негово заминување од шпанскиот гигант.
Како што сезоната се ближи кон крајот, во Мадрид веќе интензивно се зборува за реконструкција на тимот и промени на тренерската позиција. Се очекува нов стратег на клупата, а дел од ротацијата би можел да донесе и промени во играчкиот кадар.
Еден од играчите за кои, наводно, интерес покажува Арсенал е токму Родриго. Според шпанските и англиските медиуми, Бразилецот наводно не е задоволен од својот статус во тимот.
Сепак, самиот фудбалер брзо се огласи на социјалните мрежи и стави крај на сите шпекулации.
„Фала за сите пораки и грижата. Брзо се враќам. Престанете да измислувате“, порача Родриго, директно негирајќи ги тврдењата за можно заминување од „Сантијаго Бернабеу“.
Бразилецот оваа сезона одигра 50 натпревари во сите натпреварувања, постигна 13 голови и забележа 10 асистенции, што го прави значаен дел од тимот, особено во дуелите со висок интензитет како што се тие во Лигата на шампионите и Ел Класико.
И покрај тоа што Реал Мадрид оваа сезона не освои голем трофеј, Родриго останува посветен на дресот на „Лос Бланкос“, а неговите зборови потврдуваат дека е подготвен за предизвиците што следат во новото поглавје на клупската ера.
Извор: kurir.mk
