Во своето обраќање, Зеленски порача дека Русија сака да го уништи европскиот начин на живот, но истакна дека тоа нема да биде дозволено. Додаде дека Украинците заедно со Европската Унија се бранат од најантиевропската сила на современиот свет и изрази уверување дека Украина ќе ѝ се приклучи на Европската Унија откако ќе излезе како победник од војната со Русија
Претседателката на Европскиот парламент Роберта Мецола во обраќањето пред европските пратеници порача дека ЕУ ја знае жртвата што ја претрпел украинскиот народ за Европа, а затоа, како што кажа, Унијата мора на дело да ја покаже поддршката кон Украина. Мецола ги повика сојузниците да разгледаат брзи чекори за да обезбедат системи со долг дострел и борбени авиони што ги бара Киев
По ненадејните посети на Велика Британија и Франција, украинскиот претседател Володимир Зеленски денеска пристигна во Брисел каде што присуствуваше на самитот на лидерите на 27 земји членки на ЕУ. Зеленски им се обрати на пратениците на Европскиот парламент и им се заблагодари на претставниците на блокот за поддршката кон Украина.
Во своето обраќање, Зеленски порача дека Русија сака да го уништи европскиот начин на живот, но истакна дека тоа нема да биде дозволено. Додаде дека Украинците заедно со Европската Унија се бранат од најантиевропската сила на современиот свет и изрази уверување дека Украина ќе ѝ се приклучи на Европската Унија откако ќе излезе како победник од војната со Русија.
„Украина ќе победи во војната и ќе биде членка на Европската Унија“,
рече Зеленски, по што беше поздравен со овации и аплауз од пратениците во Европскиот парламент.
По неговото обраќање во ЕП, Зеленски го држеше знамето на ЕУ додека во заднина беше пуштена украинската национална химна, а потоа и европската химна „Ода на радоста“.
Претседателката на Европскиот парламент Роберта Мецола во обраќањето пред европските пратеници порача дека ЕУ ја знае жртвата што ја претрпел украинскиот народ за Европа, а затоа, како што кажа, Унијата мора на дело да ја покаже поддршката кон Украина. Мецола ги повика сојузниците да разгледаат брзи чекори за да обезбедат системи со долг дострел и борбени авиони што ги бара Киев.
„Државите мора да разгледаат брзи чекори за обезбедување системи со долг дострел и авиони што ви се потребни за да ја заштитите слободата што многумина ја земаа здраво за готово. Одговорот на војната на рускиот претседател Владимир Путин против Украина мора да биде пропорционален на заканата, а заканата е егзистенцијална“,
изјави претседателката на Европскиот парламент и додаде дека ЕУ го чува грбот на Украина.
Зеленски присуствуваше на самитот на лидерите на 27 земји од ЕУ, еден ден по средбата со британскиот премиер Риши Сунак во Лондон и со претседателот на Франција, Емануел Макрон и германскиот канцелар Олаф Шолц во Париз.
За време на средбите со Зеленски, лидерите на Франција и Германија ветија дека ќе ја задржат поддршката за воените напори на Киев, додека британскиот премиер Сунак рече дека првите британски тенкови „челинџер 2“ ќе пристигнат следниот месец и Обединетото Кралство ќе започне со обука на украински пилоти на борбени авиони според НАТО стандардите.
Извор: 360stepeni.mk
