Украинскиот претседател Володимир Зеленски изјави дека наскоро ќе се сретне со американскиот претседател Доналд Трамп како дел од напорите за ставање крај на руската инвазија.
„Договоривме средба на највисоко ниво, со претседателот Трамп во блиска иднина. Многу работи можат да се решат пред Нова година“, објави Зеленски на социјалните мрежи.
Во средата, украинскиот претседател ја откри најновата верзија на американскиот план за завршување на војната помеѓу Русија и Украина, за кој веќе недели се преговара меѓу Вашингтон и Киев.
Планот предвидува замрзнување на линиите на фронтот, но не нуди решение за најспорното прашање за териториите окупирани од Русија, кои сочинуваат повеќе од 19 проценти од Украина.
За разлика од првичната верзија на документот, составена од американската страна, новата верзија ги изоставува двата главни барања на Москва: повлекување на украинските сили од делови од Донбас кои сè уште се под нивна контрола и правно ветување од Киев дека нема да се приклучи на НАТО.
Не е веројатно дека Москва ќе се согласи со оваа нова верзија. На прашање за тоа, портпаролот на Кремљ Дмитриј Песков во средата посочи дека Москва „го формулира својот став“ и одби да ги коментира деталите.
Во четврток, портпаролката на руското Министерство за надворешни работи, Марија Захарова, изјави дека напредокот кон завршување на војната е „бавен, но континуиран“.
Извор: tv21
