БЕРЛИН (АА) – Германското Министерство за образование и истражување започна истрага со цел да се открие дали ќе биде скратена или не финансиската поддршка што им се исплаќа на академиците што ги поддржаа студентите во Германија што протестираат против нападите на Израел врз Газа, јавува Анадолу.
Голем број членови на професорската фела во Германија потпишаа отворено писмо во кое реагираа на полициската бруталност врз студентите што протестираа во знак на поддршка на Палестина на „Слободен универзитет“ во Берлин на 7 мај.
Според веста што ја објави северногерманската радио телевизија, германското Министерство за образование и истражување започнало истрага против академиците што го потпишале отвореното писмо за поддршка на студентите што протестираат против Израел.
Министерството ќе истражи дали ќе им бидат скратени или не средствата што им се даваат на академиците.
Во електронската пошта пратена до академиците тие биле прашани зошто им дале поддршка на студентите и од нив било побарано да кажат нешто во своја одбрана.
Пензионираниот професор по уставно и административно право Клеменс Арзт истакна дека барањето на Министерството е „обид за мешање во слободата на изразување“ и додаде:
„Ваквата ситуацијата, која може да доведе до последици како повлекување на финансиската поддршка, ќе претставува интервенција врз академската слобода.“
Иако по реакциите германското Министерство прифати дека пораката за поддршка што академиците им ја дадоа на студентите спаѓа во доменот на слободата на изразување, исходот од истрагата сѐ уште останува нејасен.
Соопштувајќи дека отвореното писмо е во рамките на уставното право на слобода на изразување и затоа не се донесени други заклучоци во врска со писмото, германското Министерство објави: „Според тоа, непотребни се натамошни шпекулации.“
Во соопштението нема официјална информација дали е прекината истрагата поведена за да се испита дали финансиската поддршка ќе биде скратена или не.
– Отворено писмо од професорската фела –
На 7 мај приближно 150 студенти на „Слободен универзитет“ во главниот град Берлин поставија шатори организирајќи камп на солидарност во внатрешната градина на универзитетот како знак на поддршка на Палестина и протест против притисокот врз поддржувачите на Палестина во Германија. Полицијата интервенираше на овој протест, евакуирајќи го кампот и приведувајќи голем број поддржувачи на Палестина.
По овие настани многу членови на професорскиот кадар од различни универзитети во земјата потпишаа отворено писмо во кое ги поддржуваат студентите што демонстрираа солидарност со Палестина и побараа студентите да не бидат изложени на полициско насилство.
„Независно од тоа дали се согласуваме или не со конкретните барања во кампот, стоиме покрај нашите студенти и го браниме нивното право на мирен протест“, се вели во писмото објавено на интернет.
Во писмото се наведува дека споменатите протести може да се одржат и на простори што им припаѓаат на универзитетите, дека слободата на собирање и изразување се основни демократски права што треба да се заштитат, особено на универзитетите, дека студентите треба да бидат заштитени и да не се изложени на полициско насилство.
Сојузната министерка за образование и истражување Бетина Штарк-Вацингер го критикуваше отвореното писмо потпишано од членовите на универзитетскиот професорски кадар.
Извор: Anadolu Agency (AA)
