Задолженоста на домашните компании кај банките достигна 4,05 милијарди евра во април, што е зголемување од околу 500 милиони евра во споредба со истиот месец лани. Според податоците на Народната банка, кредитирањето на корпоративниот сектор бележи силен раст – од 14,1% на годишно ниво само во април, додека првиот квартал завршил со раст од 15,3%, што е значително повеќе од минатогодишните 5,4% за истиот период.
Банкарите очекуваат дека растот ќе продолжи и во вториот квартал од 2025 година, а дополнително се олеснуваат условите за одобрување на кредити. Според анализите на Порталб.мк, еден од факторите што придонесуваат за растот е унгарскиот кредит, кој преку Македонската банка за поддршка на развојот (МБПР) се насочува кон деловните банки, а оттаму и до домашните компании.
Во новата анкета на Народната банка се посочува дека постои засилена побарувачка за кредити од сите сектори, со исклучок на преработувачката индустрија. Потребата од финансирање е најчестиот мотив за зголемување на кредитната активност.
Во средината на мај беше исплатена нова транша од унгарскиот кредит во висина од 41,3 милиони евра, наменета за поддршка на 175 компании – од кои 100 микро и мали, 57 средни и 18 големи. Досега, од вкупно 250 милиони евра најавени средства, преку МБПР на банките се префрлени 125,8 милиони евра.
Колку должат домаќинствата?
Додека задолженоста на компаниите расте брзо, кредитите кај домаќинствата растат поумерено. Заклучно со април, населението должи вкупно 4,16 милијарди евра, што е за 67,7 милиони евра повеќе во однос на април 2024 година. Најголем дел од овие средства се за потрошувачки и станбени кредити:
Потрошувачки кредити: 2,15 милијарди евра
Станбени кредити: 1,60 милијарди евра
Кредитни картички: 140 милиони евра
Иако банкарите предвидуваат раст и кај кредитирањето на населението, се очекува поумерено олеснување на условите. Според Народната банка, најзначајни промени се забележуваат кај каматните стапки и маргините на станбените и потрошувачките кредити.
Вкупна слика
На крајот на април, вкупната кредитна задолженост во банкарскиот сектор – вклучително и домаќинствата и компаниите – достигна 8,26 милијарди евра. Тоа претставува годишен пораст од 11,8% и месечен од 0,8%.
ИЗВОР: racin.mk
