Во источните и јужните делови на Украина синоќа беше прогласена воздушна тревога, откако украинските вооружени сили преку „Телеграм“ предупредија за нови руски напади со беспилотни летала.
Украинските воздухопловни сили соопштија дека нападите се случиле во областите Суми, Харкив, Днипро и Миколаив, како и над црноморскиот пристанишен град Одеса. Според властите, во нападите биле користени и ирански дронови од типот „Шахед“.
Локални медиуми јавија за експлозии во областа Суми, која се наоѓа во близина на границата со Русија.
Сѐ уште не е познато дали интензитетот на овие напади е ист како и во изминатите ноќи. Украинските власти вчера соопштија дека во текот на викендот и претходниот ден биле регистрирани најголемиот број руски напади со дронови и ракети од почетокот на целосната инвазија во февруари 2022 година.
Извор: 24vesti.mk
