Претседателот на Србија, Александар Вучиќ, на средба со своите најблиски соработници во седиштето на партијата рекол дека ќе се повлече од функцијата претседател, објави шефот на Извршниот одбор на СНС, Дарко Глишиќ, пренесува РТС. Медиумите јавуваат дека на средбата имало несогласувања и повици да се отфрлат преговорите со САД и ЕУ.
Според информациите, претседателот Вучиќ одговорил на овие несогласувања и рекол дека ако некој мисли дека може да ја води земјата подобро од него, тој е подготвен да им го остави тоа ним, а потоа ја напуштил средбата.
ТВ Пинк јавува дека Вучиќ, меѓу другото, им порачал на сопартијците дека „доколку народот ги отфрли преговорите и ако некој мисли дека треба економски да ја уништиме државата, раководството ќе го препушти на попаметните од него“.
По средбата, Дарко Глишиќ за ТВ Пинк изјави дека доколку претседателот Вучиќ остане на ставот и поднесе оставка, тоа е крај за СНС и крај на кариерата што СНС ја имаше на српската политичка сцена.
После тоа, смета тој, следува „најтемното и најлошото сценарио за Србија“ што не може ни да го замисли.
Беше тешка вечер, вели Глишиќ.
Иако не објасни дали претседателот кажал под кои околности ќе поднесе оставка, дали на функцијата претседател на партијата или на државата, Глишиќ повтори дека „ако поднесе оставка и ако се држи до неа, ќе биде најлошото нешто што ќе и се случи на Србија“.
Претседателот Вучиќ, како што е најавено, в понеделник ќе присуствува на седницата на Владата на Србија, која започнува во 11 часот. Најавено е и дека во 20 часот ќе им се обрати на граѓаните на Србија по разговорите во петокот со претставниците на ЕУ и на САД и изјавата дека Србија е подготвена да го прифати концептот на европскиот план за нормализирање на односите со Косово.
Извор: 360stepeni.mk
