Вучиќ и Столтенберг денеска во Брисел ќе разговараат за состојбата во Косово

Брисел денеска е важна адреса за Белград бидејќи во истиот ден ќе се разговара во седиштето на НАТО и на Европската Унија

Српскиот претседател Александар Вучиќ денеска ќе се сретне со генералниот секретар на НАТО, Јенс Столтенберг, а специјалниот пратеник на Европската Унија за дијалог Мирослав Лајчак ќе разговара со главните преговарачи на Белград и Приштина, Петар Петковиќ и Бесник Бисљими.

Портпаролката на НАТО, Оана Лунгеску, на Твитер потврди дека Столтенберг денеска ќе се сретне со Вучиќ и најави заеднички изјави за попладнево.

Средбата ја побара Вучиќ минатата недела за, како што најави, да му пренесе на Столтенберг сè за случувањата во Косово. Дополнително, Вучиќ рече дека ќе побара Советот за безбедност на ОН да иницира итни мерки за заштита на косовските Срби.

• Вучиќ најави дека ќе бара седница на Советот за безбедност на ОН за ситуацијата во Косово

Инаку, во Брисел денеска ќе се одржи нова рунда преговори во рамки на дијалогот Белград – Приштина. Специјалниот претставник на ЕУ за дијалог Мирослав Лајчак ќе разговара со главните преговарачи на Белград и Приштина, Петар Петковиќ и Бесник Бислими.

Според портпаролот на ЕУ, Питер Стано, фокусот на разговорите ќе биде ставен на целосното спроведување на договорот од 27 февруари и на чекорите кон деескалација на ситуацијата на северот на Косово.

• Мирослав Лајчак ќе им биде домаќин на главните преговарачи на Косово и Србија, фокусот целосно спроведување на договорот од Брисел

На 10 јули Лајчак и главниот преговарач на Косово во дијалогот со Србија, Бесник Бислими, по средбата во Братислава потврдија дека постигнале договор за деескалација на ситуацијата на северот на Косово, а еден ден подоцна беа презентирани и конкретните чекори кои предвидуваат повлекување на 25 отсто од косовската полиција од и околу општинските згради на северот, организирање вонредни локални избори на крајот на летото и враќање на дијалогот за нормализација на односите меѓу Косово и Србија.