Врховниот суд на САД соопшти дека ќе ги разгледа првите случаи поврзани со учеството на трансродови лица во женски спортски натпревари – тема која предизвикува сè поголеми политички и правни поделби во земјата.
Судот, во кој мнозинство имаат судии со конзервативни ставови, ќе одлучува по законите на две сојузни држави кои забрануваат лица родени како мажи да се натпреваруваат во женски спортски екипи. Постапките ќе се водат меѓу октомври оваа и летото следната година.
Претходно, Врховниот суд дозволи на сојузната држава Тенеси да забрани хормонски и медицински третмани за трансродови малолетници, пресудувајќи дека таа мерка не претставува дискриминација.
Исто така, судот привремено му дозволи на претседателот Доналд Трамп да ги исклучи трансродовите лица од американската армија.
Трамп, кој во вториот мандат усвои значително поригидни политики кон трансродовата заедница, на својата инаугурација изјави дека „постојат само два пола – машки и женски“. Тој се закани дека ќе го намали федералното финансирање на организации кои дозволуваат трансродови лица да се натпреваруваат во женски дисциплини.
Одлуката на Врховниот суд по овие предмети се очекува во текот на летото 2026 година.
Извор: 24vesti.mk
