Вонредна состојба во повеќе градови во Србија поради поројните врнежи кои предизвикаа поплави

Од Штабот за вонредни состојби на Србија соопштија дека две лица кои паднале во реката Трнавица кај Нови Пазар се водат како исчезнати и потрагата нив сè уште трае

Поради обилните врнежи од дожд и излевањето на повеќе реки во соседна Србија, во градовите Приеполе, Сеница, Нови Пазар, Брус и Тутин е прогласена вонредна состојба.

Како последица на обилните врнежи кои траат повеќе од 15 часа, од своето корито се излеа и реката Ибар во близина на главниот мост во северна Косовска Митровица. Во општина Звечан се излеаја потоци и реки, а поплавени се повеќе од 50 куќи.

Припадниците на Секторот за вонредни состојби на српското Министерство за внатрешни работи досега евакуирале 84 лица од поплавените подрачја во Нови Пазар, Сеница, Приеполе, Прибој и Брус. Најмногу евакуирани има во Прибој – 30, потоа Сеница (24), Брус (16) и Нови Пазар (5), соопшти МВР на Србија, јави РТС.

Како што пренесува медиумот, во моментов најкритично е во Бродарево и Приеполе, како и во Тутин, Нови Пазар и Брус, каде во текот на вечерта се очекува смирување на состојбата.

Од Штабот за вонредни состојби на Србија соопштија дека две лица кои паднале во реката Трнавица кај Нови Пазар се водат како исчезнати и потрагата нив сè уште трае.

Оттаму апелираат до граѓаните да избегнуваат движење и престој во близина на реки и други водотеци, како и да не поминуваат по импровизирани мостови.