Јавното претпријатие Водовод и канализација – Скопје соопшти дека нема никаква вина за прекинот на водоснабдувањето во детската болница Козле. По теренски увид, нивните екипи утврдиле дека дефектот потекнува од внатрешната водоводна инсталација на самата болница, која е надвор од надлежност на ЈП Водовод.
Од претпријатието истакнаа дека болницата е веќе информирана и дека е потребна итна санација од нивна страна. Дополнително, Водовод алармира дека при увидот било забележано нерационално користење на водата за пиење, односно полевање на тревни површини и зеленила, иако во болницата имало прекин на водоснабдувањето.
„Се занемарени примарните работни активности, а водата се троши за полевање – тоа е недозволиво во овие услови“, велат од ЈП Водовод и канализација – Скопје.
Претпријатието ги отфрли обвинувањата што дојдоа од страна на раководството на болницата и потенцираше дека се работи за неоправдани напади.
Сепак, со цел да се овозможи минимален пристап до вода за најмладите пациенти, пред објектот е поставена цистерна со питка вода.
ИЗВОР: ТВ 21
