Центарот за јавно здравје Куманово потврдува присуство на тешки метали во водата на Крива Река – манган, цинк, олово и кадмиум ја надминале граничната вредност и ја направиле водата во реката неупотреблива без претходна обработка, изјави градоначалникот на Крива Паланка, по барање на риболовното здружение „Мрена” кое ги нарачало овие дополнителни анализи.
Ова се четврти анализи направени од различни лаборатории за состојбата на водата во Крива Река по тие на општината Крива Паланка, компанијата Булмак 2016 и Министерството за животна средина, кои се уште не се пристигнати, три недели после истекувањето на јамската вода од рудникот Тораница во Тораничка река.
– За нас ќе бидат валидни само анализите направени од страна на лабораторијата на Универзитетот Гоце Делчев во Штип. Се тестира водата и од Крива Река и од Тораничка. Треба да има одговорност доколку некоја од анализите на Општината, компанијата или риболовното здружение не ја покажуваат вистината. – Министерство за животна средина.
Од Обвинителството велат дека ќе има и дополнителни вештачења.
– Оформен е предмет, се преземаат дејствија на проверки. Инспекторите кои постапувале доставија извештај од преземените дејствија до обвинителството. Ќе се наредат и соодветни вештачења за испитување на сите околности. До овој момент не е пристигната пријавата од градоначалникот. – Основно Јавно обвинителство.
Додека градоначалникот на Крива Паланка тврди дека водата во Крива Река е екстремно загадена, од компанијата Булмак 2016 велат дека дури и тоа да е така, според нивните анализи, загаденоста не доаѓа од јамската вода која истекла при пукнување на цевката и апелираат до надлежните институции да истражат други потенцијални загадувачи.
Извор: 24vesti.mk
