По околу 12 часа напорна работа заврши санацијата и реконструкцијата на градскиот водовод, а водата во чешмите на жителите на поголемиот дел на Скопје повторно протече. Над 160 вработени во Водовод од доцна синоќа по тешката работа што ја имаа цела ноќ и утро при лоши временски услови успеаја да го поправат она што со години не беше направено. На местото на главниот дефект во Карпош 4 на улицата „Никола Парапунов“ напладне привршуваа работите, а таму беше и градоначалничката Данела Арсовска. Таа рече дека во извршувањето на оваа реконструкција биле вклучени голем број вработени на Водовод кои за брзо време завршиле нешто што било проблем со децении.
-Нашите експерти, луѓето, како помошно-технички и машинските инженери, ВКВ водоводџиите кои што работеа на овој проект успеаја навистина во најкраток можен рок да го завршат истиот, затоа што оваа операција опфаќаше не само во моментот работа на терен туку и вадење на оние елементи од самите затворачи носење на истите во јавното претпријатие каде што на соодветна апаратура беа креирани практично нови со кои што беа заменети старите и оваа модернизација е нешто што за прв пат се случува, изјави градоначалничката на Скопје, Данела Арсовска.
Првиот човек на Водовод Тони Милевски објасни што се е направено.
-Се променија 5 воздушни вентили каде што имаше заробен воздух во цевководот за подобрување на водоснабдувањето. Исто така се направија поправка на два затварачи Фи 700 милиметри, еден затварач Фи 600 милиметри и еден затварач Фи 500 милиметри и замена на еден затворач нов комплетно на Фи 400 милиметри каде што децениски проблем имаше во општината Ѓорче каде што имаше намален притисок на вода, изјави директорот на Водовод и канализација, Тони Милевски.
Од Институтот за јавно здравје предупредуваат дека водата не смее веднаш да се пие, а чешмите да се пуштат одредено време да истече водата.
–Препорачуваме граѓаните да не ја пијат веднаш водат по нејзиното пуштање во водоводната мрежа зашто контактното време на време на резидуалниот хлор и водата во мрежата тоа е времетп потребно резидуалниот хлор да почне да делува врз микробиомот присутен во водата, во услови на вакви пониски амбиентни температури може да потрае и до 1 час, изјави Марија Андоновска од Институтот за јавно здравје.
Прекинот на водоводната мрежа се случи нешто по 22 часот поради најавениот сложен зафат за санација на централниот цевковод. Поради ова граѓаните беа приморани да складираат вода вода за пиење и за неопходните потреби.
ИЗВОР: ТВ 21
