Во судирите со израелските војници во окупираниот град Наблус на Западниот Брег загинаа 11 Палестинци, меѓу кои најмалку четворица вооружени бунтовници и четворица цивили, објавија странските агенции, повикувајќи се на извештаи од службите за итни случаи. Повеќе од 100 луѓе се повредени.
Израелската армија преку соопштение ја потврди вчерашната операција во Наблус, посочувајќи дека нејзините војници биле подложени на напад додека се обидувале да приведат бунтовници осомничени дека подготвувале претстојни напади. Нема жртви меѓу израелскиот воен персонал, се вели во соопштението.
Палестинската група „Исламски џихад“ соопшти дека израелските војници опколиле двајца нејзини команданти во куќа во Наблус, што предизвикало судир на кој се приклучиле и други палестински милитанти.
Според палестински извори, двајцата команданти на „Исламски џихад“ биле убиени заедно со други вооружени лица. Меѓу жртвите има четворица цивили.
Безбедносната ситуација во Израел и на палестинските територии продолжува да биде крајно напната со недели. (МИА)
Фото: ЕПА
ИЗВОР: kurir.mk
