БЕЛГРАД (АА) – Со одлука на Владата на Србија денес во земјата е ден на жалост поради трагичните настани во Косово, а по тој повод знамињата на зградите на институциите се спуштени на половина копје, јавува Анадолу.
Од Владата на Србија вчера ги замолија сите медиуми и организатори на јавни манифестации да ја приспособат денешната програма на денот на жалоста и на тој начин да им оддадат почит на настраданите во Косово.
На улиците низ Белград може да се забележи дека знамињата на зградите на српските институции се спуштени на половина копје. Исто така, на киосците забележливо е дека насловните страници на дневниот печат им дадоа простор токму на немирите во Косово.
По повод убиството на полицаецот Африм Буњаку кај Бањска, на северот на Косово, понеделник беше ден на жалост во Косово.
Околу три часот по полноќ на 24 септември во Бањска, Звечан, Африм Буњаку беше убиен во напад врз косовските полициски единици, а полицаецот Албан Рашити беше ранет. Во акцијата на косовската полиција убиени се четворица напаѓачи, а шестмина се лишени од слобода.
