Во Штип на традиционален начин се одбележува празникот Младенци и обичајот Четр’се

Младенци го означува почетокот на пролетта. Овој ден е еден од поголемите христијански празници од пролетниот циклус каде што се слави споменот на четириесетте војници од Севастија, кои маченички загинале не откажувајќи се од христијанската вера.

Денешниот празник Младенци во Штип се прославува на посебен начин. УНЕСКО од лани го заштити обичајот наречен Четрсе според бројот на каменчињата кои ги собираат младите штипјани качувајќи се на Исарот.Од утрово традицијата на љубовта со која младите треба да си го најдат избраникот на својот живот, го разбуди ридот над Штип.40 каменчиња фрлени од врвот на Исарот, 40 ракувања, 40 мекици, 40 чашки ракија за здравје.

– Да, да имаше рекорди, до 28 чашки, но не ги запишувавме. Се е тоа од наши секавања за пријатни поминати моменти на овој празничен ден со сите кои ми беа гости на мојата кукна слава, изјави Орце Иљов, еден од штипјаните чиј дом е на падините на Исарот.