Во израелските напади во изминатите 24 часа во Газа загинаа 107 Палестинци, вкупниот број се искачи на 27.238

АНКАРА (АА) – Најмалку 107 Палестинци загинаа, а 165 се повредени во последните 24 часа во израелските напади врз опколениот Појас Газа, соопшти денес Министерството за здравство на енклавата, јавува Анадолу.

„Израелската окупација изврши 12 масакри врз семејства во Појасот Газа, оставајќи 107 загинати и 165 повредени во текот на изминатите 24 часа“, истакна Министерството.

„Многу луѓе се под урнатините и на патиштата бидејќи спасувачите не можат да стигнат до нив“, се нагласува од Министерството.

И покрај одлуката на Меѓународниот суд на правдата за привремените мерки донесена минатиот месец, Израел продолжува со нападот врз Појасот Газа, каде според палестинските здравствени власти од 7 октомври досега загинати се најмалку 27.238 Палестинци, главно жени и деца, а 66.452 се повредени.

Израел започна жестоки напади врз Појасот Газа по прекуграничниот напад на Хамас, во кој Тел Авив вели дека загинале речиси 1.200 Израелци.

Израелската офанзива остави 85 отсто од населението на Газа внатрешно раселено, акутен недостиг на храна, чиста вода и лекови, и 60 отсто од инфраструктурата на енклавата оштетена или уништена, според Обединетите нации.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.