Започна новото издание на „Генералка викенд“ – иницијатива за масовно чистење на отпадот што несовесни граѓани го оставаат низ природата. Илјадници волонтери од сите општини низ земјата се вклучени во акцијата, која е симбол на заедничка грижа и одговорност кон животната средина.
Организаторите повикаа на зголемена еколошка свест и колективна одговорност, нагласувајќи дека „нема здравје без чиста животна средина“.
Додека претседателката Гордана Сиљановска-Давкова и странските амбасадори останаа до крајот на чистењето кај Скопскиот Аквадукт, министерот за животна средина Изет Меџити замина порано – потег кој не остана незабележан.
Во изминатите пет години, преку „Генералка викенд“ се собрани над 1.000 тони отпад, со ангажман на повеќе од 44.000 волонтери. За секои 10 килограми собран отпад се засадува едно дрво – досега над 135.000 нови садници низ земјата.
Акцијата продолжува до недела, а пораката е јасна: како што го чистиме домот на пролет, така треба да се грижиме и за нашиот заеднички дом – природата.
ИЗВОР: racin.mk
