Коалицијата ВЛЕН со остри критики кон ДУИ, обвинувајќи ја партијата за лицемерие и поврзаност со личности кои, како што тврдат, стојат зад организирање на просрпски собири во земјава.
Од ВЛЕН велат дека ДУИ е „последната партија што може да зборува за српско влијание“, потсетувајќи дека токму тие биле дел од иницијативата „Отворен Балкан“, која според нив му служела на српскиот претседател Александар Вучиќ и ја заобиколувала Косово.
„Наместо политички циркус и обвинувања кон ВЛЕН, ДУИ треба јавно да одговори за своите врски со Вљадимир Стајиќ, човек кој се поврзува со организирање собири во поддршка на Вучиќ“, наведуваат од коалицијата.
Во реакцијата се тврди дека Стајиќ е близок со Бујар Османи, а од ДУИ бараат објаснување какви односи имаат со него и зошто, како што велат, луѓе блиски до партијата се поврзуваат со организатори на просрпски настани.
ВЛЕН порачува дека се против секое српско влијание и против, како што велат, обиди Северна Македонија да се оддалечи од евроатлантскиот пат, но истовремено ја обвинуваат ДУИ за политичка хипокризија.
„Кога беа на власт правеа политички договори, а кога ја загубија власта почнаа да зборуваат дека е загрозено албанството“, стои во соопштението на ВЛЕН.
