АНКАРА (АА) – Воената администрација на Нигер ѝ ги исклучила водата и струјата на француската амбасада во главниот град Ниамеј, а не се дозволува ни испорака на храна за амбасадата, се вели во повеќе јавувања објавени на социјалните мрежи, пренесува Анадолу.
Раководството на земјата презело слични чекори и за францускиот конзулат во Зиндер.
Претседателот на Националниот комитет за поддршка на Националниот совет за заштита на земјата (CNSP), Ел Иса Хасуми Буреима, побара од сите партнери на француските бази во Нигер да ја прекинат сета испорака со вода и електрична енергија, како и прехранбени производи, се наведува во наводите.
Се додава дека сите партнери што ќе продолжат да им помагаат на Французите во процесот на снабдување со стоки и услуги ќе се сметаат за „непријатели на суверениот народ“.
Наводите доаѓаат откако вчера истече дводневниот рок што воената администрација му го даде на францускиот амбасадор да ја напушти земјата.
Во услови на тензии, кои се зголемија во неделите по соборувањето на демократски избраниот претседател на западноафриканската држава, Мухамед Базум, Министерството за надворешни работи на администрацијата му даде на амбасадорот Силван Ите 48 часа „да ја напушти територијата на Нигер“.
Нигер е втурнат во немири од 26 јули кога генералот Абдурахаман Тчиани, поранешен командант на претседателската гарда, предводеше воена интервенција со која беше соборен претседателот Базум.
Франција започна операција на почетокот на овој месец за евакуација на своите граѓани, како и други државјани од Нијамеј.
