Според Управата за хидрометеоролошки работи, до следната среда ќе се задржи сончево и многу топло време со високи утрински и дневни температури, поради што ќе биде активно портокалово ниво на опасност од високи температури
Продолжува периодот на сончево и многу топло време. Денеска максималната температура ќе биде од 34 до 41 степен. УВ индексот ќе биде 10.
Во Скопје, слично време со максимална температура до 39 степени.
За утре, истотака се најавува сончево и многу топло со слаб до умерен ветер од северозападен правец.
Топлото време со високи утрински и дневни температури, според Управата за хидрометеоролошки работи, ќе се задржи до следната среда.
„До следната среда ќе се задржи сончево и многу топло време со високи утрински и дневни температури, поради што ќе биде активно портокалово ниво на опасност од високи температури. Благо опаѓање на температурата за два до три степени ќе има само во понеделник. UV индексот и понатаму ќе има многу висока вредност 10“,
соопшти УХМР.
Уште се на сила владините препораки за намалување на ризиците од високите температури.
Владата препорача ослободување од физичко присуство на работното место на најранливите групи население, како што се: бремените жени и лица на возраст над 60 години, со организирање онлајн работата, таму каде техничко-технолошкиот процес го овозможува тоа.
Во установите за згрижување на децата (градинки), да не се практикува физичка активност и да не се изнесуваат децата на отворено во периодот од 11 до 17 часот.
Единиците на локалната самоуправа, Црвениот крст и Центрите за социјални работи, во регионите зафатени со топлотниот бран да пружаат помош на осамени, стари, изнемоштени лица и бездомници.
Владата препорача и приватниот сектор да го организира работното време со цел заштита од директна сончева изложеност на работниците, пред сѐ избегнување престој на отворено во периодот од 11 до 17 часот.
Мерките се на сила до 25 јули.
ИЗВОР: 360stepeni.mk
