Во пожарот е зафатена шума на околу сто хектари. Градоначалникот на Општина Илинден се надева на мирна ноќ и најавува дека рано изутрина, ако е потребно, повторно ќе се вклучат хеликоптерите и ер-тракторите, кои инаку не можат да функционираат во ноќни услови
Пожарот кај скопското село Ајватовци, на територија на општина Илинден, е под контрола, но и натаму е опасен и активен поради што пожарникарите и локалното население ќе останат будни преку ноќта, вели градоначалникот на Илинден, Александар Георгиевски, во изјава објавена вечерва по 22 часот на фејсбук-профилот на Центарот за управување со кризи (ЦУК).
Во пожарот што избувна попладнето, зафатена е шума на околу сто хектари, од кои околу 20-30 хектари борова шума е изгорена.
„Имаше критични ситуации во кои беше загрозен манастирот во Ајватовци, дури и селото Ајватовци, но благодарение на несебичните граѓни кои дојдоа да помогнат, но пред се на противпожарната бригада, на ЦУК, Дирекцијата за заштита и спасување, кои заедно со хеликоптерите и авионите, помогнаа во гаснењето на овој пожар, колку-толку тој се локализираше и сега е под контрола“,
вели градоначалникот на Општина Илинден.
Тој се надева на мирна ноќ и најавува дека рано изутрина, ако е потребно, повторно ќе се вклучат хеликоптерите и ер-тракторите, кои инаку не можат да функционираат во ноќни услови.
ЦУК вечерва објави и снимка од тоа како огнот од едниот крак на пожарот се движи кон репетиторот над Ајватовски рид.
ИЗВОР: 360stepeni.mk
