Во Венеција од денеска официјално ќе стапи во сила долго најавуваната такса за еднодневни посетители во историскиот центар на градот.
Како што пишува „Гардијан“, секој посетител кој не планира да преноќи таму, пред да влезе во градот мора да купи онлајн билет што чини пет евра.
Билет е потребен само за пристап до историскиот центар на Венеција, а пробната фаза на собирање билети ќе се спроведува од четврток до 14 јули. Жителите, патниците, студентите и децата помлади од 14 години се ослободени, како и туристите кои преноќуваат.
Дневните патници ќе добијат QR-код откако ќе го купат нивниот билет. Оние кои немаат билет можат да купат по пристигнувањето, со помош на локалните редари, кои исто така ќе вршат проверки по случаен избор на петте главни точки за влез во градот, вклучувајќи ја и железничката станица Санта Лусија.
Советот на Венеција соопшти дека билет за 25 април резервирале над 5.000 луѓе, со што првиот ден заработиле околу 27.000 евра за градската каса. Иако не постојат бариери за да се осигура дека секој има пропусница, оние што ќе бидат фатени без билет може да бидат казнети со парична казна помеѓу 50 и 300 евра. Поентата на системот за наплата е да се заштити од ефектите на масовниот туризам и да ги одврати излетниците.
Извор: alsat.mk
