Кривичниот суд во Скопје го одобри обвинителниот акт против Васил Јованов, кој е осомничен за сообраќајната несреќа во која животот го загуби 22-годишната Фросина Кулакова на булеварот Партизански одреди на 29 јануари годинава.
„Советот за оценка на обвинителен акт го одобри обвинението на Основното јавно обвинителство со број КО 271/25 од 27.03.2025 година, против В.Ј. за кривично дело – Тешки дела против безбедноста на луѓето и имотот во сообраќајот“, информираа од Кривичниот суд.
Со оваа одлука, формиран е кривичен предмет под број К.бр. 780/25 кој ќе биде распределен за понатамошно судење преку електронскиот АКМИС-систем.
Од Судот дополнуваат дека странките и јавноста ќе бидат известени кога ќе биде закажан терминот за главната расправа.
Несреќата која се случи на крајот на јануари предизвика бурни реакции во јавноста, откако беше објавено дека младата Фросина загинала по удар од возило на Партизанска, во момент кога се движела по пешачка патека.
Извор: 24vesti.mk
