ВАШИНГТОН (АА) – Во последниве денови, американскиот претседател Џо Бајден тајно одобрил милијарди долари за нови бомби и борбени авиони за Израел, и покрај загриженоста на Вашингтон поради очекуваната воена офанзива на југот на Појасот Газа што може да ги загрози животите на стотици илјади палестински цивили, се наведува во медиумскиот извештај објавен вчера, пренесува Анадолу.
„Оружјето што оваа недела го одобри американскиот претседател вклучува 1.800 бомби МК84 со тежина од по 907 килограми и 500 бомби МК82 со тежина од по 226 килограми“, изјавија за „Вашингтон пост“ неименувани претставници на Министерството за одбрана и Стејт департментот.
Стејт департментот минатата недела одобри трансфер на 25 борбени авиони Ф-35А и мотори, додаде американскиот претставник.
Вредноста на авионите и моторите се проценува на околу 2,5 милијарди долари.
Продажбата не е јавно објавена, а нема ниту соодветни најави на веб-страницата на Агенцијата за безбедносна и одбранбена соработка каде вообичаено се објавуваат вакви соопштенија.
Бајден и израелскиот премиер Бенјамин Нетанјаху станаа се подистантни во последните неколку недели, а напнатоста расте откако Соединетите Американски Држави не ставија вето на резолуцијата на Советот за безбедност на Обединетите нации со која се бара итен прекин на огнот во Газа.
Нетанјаху возврати со ненадејно откажување на планираната посета на Вашингтон на израелска делегација за разговори за американските алтернативи за израелската инвазија на Рафа. Состанокот сега е повторно закажан.
Поголем дел од Појасот Газа е уништен откако Израел ја започна војната во октомври минатата година по прекуграничниот напад на Хамас. Израелските сили со месеци уништуваат згради и цели населби. Уништена е 60 отсто од инфраструктурата на палестинската енклава. Во израелските напади досега загинаа повеќе од 32.600 Палестинци.
Меѓународниот суд на правдата (МСП) назначи дополнителни привремени мерки, вклучително и „непречено обезбедување“ помош за Појасот Газа, во тековната постапка за геноцид која е во тек против Израел на барање на Јужноафриканската Република.
Извор: Anadolu Agency (AA)
