Собранието во рамки на денешната 35. седница ја донесе одлуката за распишување јавен оглас за избор на здружение од областа на човековите права, полициското право и правосудството за механизмот за граѓанска контрола во состав на Народниот правобранител, како и одлуката за објавување јавен оглас за именување директор на Агенцијата за квалитет во високото образование. Исто така, беше утврдена потребата за носење на измените и дополнувањата на Законот за заштита на потрошувачите и на Законот за вршење на сметководствени работи, по скратена постапка.
Без дискусии помина првото читање од Законот за изменување на Законот за националната инфраструктура на просторните податоци на Република Северна Македонија и постапката за носење на истиот ќе продолжи со второ читање, односно ќе се достави до Комисијата за политички системи, односи меѓу заедниците и Законодавно-правната комисија на Собранието.
На седницата беше поддржана оценката дека неоправдано е барањето за автентично толкување на Законот за вработените во јавниот сектор, односно укинувањето на балансерот, поднесено од пратениците на ДУИ. Во име на подносителите на барањето, пратеничката Арина Ајдари истакна дека од денот на поднесувањето до ставањето на дневен ред на седница поминале шест месеци, поради што беспредметно е разгледувањето на ова барање, а упати и критика што досега не е донесен најавениот закон за правична застапеност.
Пратениците го изгласаа Законот за изменување на Законот за складирање и заштита од запаливи течности и гасови, по што на дневен ред се најде предлог-законот за изменување и дополнување на Законот за патните исправи на државјаните на Република Северна Македонија во второ читање. По гласањето за предлогот пратениците од ДУИ реагираа на начинот на утврдување присутни во салата при номиналното изјаснување на пратениците кои се припадници на немнозинските заедници, по што беше побарана пауза од еден час.
Инаку, не беа прифатени три закони по скратена постапка, од кои едниот е предлог-закон за изменување на Законот за заштита на потрошувачите поднесен од пратеничката група на Левица, а што се однесува на укинивање на обврската за двојазични декларации на амбалажата на производите во трговијата. Не беше прифатен и предлогот за дополнување на Кривичниот закон со кој се бараа измени околу кршење на законот од страна на судиите, а поддршка да се носи по скратена постапка не доби и предлог-законот за изменување и дополнување на Законот за додадена вредност, поднесен од пратениците на СДСМ, кои со ова законско решение бараа намалување на стапката на ДДВ од 18 на 5 отсто за електричната енергија и целосно укинување на овој данок за прехранбените производи.
ИЗВОР: kurir.mk
