Претседателските избори ќе бидат распишани утре, точно 70 дена пред одржувањето на првиот круг на 24 април, а заедно со нив се очекува првиот човек на Собранието Јован Митревски да ги распише и парламентарните избори. Поради тоа што изборите се регуларни, Собранието нема да се распушти и ќе продолжи да работи нормално барем до почетокот на април, кога и официјално ќе започне кампањата за претседателските избори. Ова го изјави првиот човек на Собранието Митревски во интервју за 360 степени.
СДСМ најавува дека до крајот на месецот ќе ги заврши процедурите за избор на кандидатот за претседател, додека неофицијално се говори дека партијата го мери рејтингот меѓу актуелниот претседател Стево Пендаровски, поранешниот министер Оливер Спасовски и секретарот на партијата Миле Зечевиќ. Се очекува нивниот кандидат да биде консензуален и да ја добие поддршката и од другите владејачки партии.
ВМРО-ДПМНЕ ќе го потврди името на својот кандидат на партиската конвенција на 2 март. Јавниот повик за кандидати е отворен, но партијата своите мерења ги насочи на три. Во медиумите се спомeнуваат имињата на пратеничката Гордана Силјановска Давкова и професорот Александар Спасеновски.
Албанската опозиција, од друга страна, ја држи отворена опцијата лидерот на АА Арбен Таравари да биде нивен можен кандидат.
Кандидат за претседател, досега промовираше само „Левица“, професорката Билјана Ванковска.
ДИК по распишувањето на изборите, следниот ден, треба да ги потврди официјалните законски рокови кои ќе и претходат на подготовката за изборите.
„Списокот на кандидати (за претседател, пратеници и советници) се доставува до надлежната изборна комисија 35 дена пред денот на изборите“, се вели во Изборен законик.
Според првичните проценки, 20 март ќе биде краен рок за официјализирање на претседателските кандидатури. Што се однесува до роковите за листите на кандидати за пратеници, неофицијално, рокот ќе биде 3 април.
Како што се наближуваат изборите, институцијата за организација на изборите ги продолжува изборните подготовки, притоа функционира со член помалку, бидејќи пратениците не го одобрија предлогот на албанската опозиција за нивен член, Наместо седум, ДИК во моментов има шест члена.
Првиот круг од претседателските избори е на 24 април, а вториот круг и парламентарните избори на 8 мај./Алсат.мк
Фатлуме Дервиши
Извор: alsat.mk
