Давајќи образложение за поништувањето на упатството, портпаролката на Уставниот суд, Христина Беловска, кажа дека Судот оценил оти во случајот е повреден членот 52 став 2 од Уставот, односно не е испочитуван уставниот рок во кој ова упатство требало да се објави во „Службен весник“
Упатството за водење матични книги, со кое се воведе графа за етничката припадност во изводите од матична евиденција, „падна“ на Уставниот суд. Причината поради која Судот го поништи актот е поради пречекорувањето на законскиот рок во кој Министерството за правда требало да го достави упатството до „Службен весник“.
Давајќи образложение за поништувањето на упатството, портпаролката на Уставниот суд, Христина Беловска, кажа дека Судот оценил оти во случајот е повреден членот 52 став 2 од Уставот, односно не е испочитуван уставниот рок во кој ова упатство требало да се објави во „Службен весник“.
Членот 52, став 2 од Уставот, на кое се повикуваат од Судот, гласи: „Законите и другите прописи се објавуваат во ‘Службен весник на Република Македонија’ најдоцна во рок од седум дена од денот на нивното донесување“.
Иако во постапката која Уставниот суд ја поведе во однос на упатството не е оспорена содржината на самиот текст, односно прашањето за воведување на графата за националност, од Судот велат дека кон почитувањето на законскиот рок во постапките не пристапуваат технички, туку суштински.
„Уставниот суд веќе појасни во јавноста дека на прашањето за рокот не му пристапува технички, туку суштински и тој треба да биде почитуван од сите“,
изјави портпаролката на Уставниот суд.
Одлуката на Судот има ретроактивно дејство, односно ќе важи од моментот на објавување во „Службен весник“.
„Во однос на прашањата што значи оваа одлука за извадените изводи согласно упатството, Судот појаснува дека одговорот на ова прашање треба да се бара преку толкување на член 81 став 1 од Деловникот на Судот, кој дава право на секој граѓанин којшто смета дека со поединечен акт, или во случајот издавањето на изводите му е повредено некое право може да бара поништување на таквиот акт во рок од шест месеци од денот кога ќе се објави одлуката на Уставниот суд“,
се наведува во соопштението од денешната одлука на Судот.
Упатството за матичните книги, во кое беше додадена графата за националност, беше донесено од министерот за правда Кренар Лога на 29 мај годинава. Актот беше објавен во „Службен весник“ на 15 јуни, односно 17 дена од неговото усвојување, или поконкретно – 10 дена од истекот на законскиот рок за оваа процедура.
Уставните судии изразија сомнеж во уставноста на ова упатство и покренаа иницијатива за проверка на законитоста. Во меѓувреме, односно на 5 јули, Судот донесе времена мерка со која го стави надвор од употреба упатството на Лога додека не се донесе конечна одлука за предметот.
Неодамна министерот за правда повторно го прозва Уставниот суд да донесе одлука во врска со предметот за уставноста и законитоста на упатството за водење матични книги, велејќи дека упатството не е противзаконски.
ИЗВОР: 360stepeni.mk
