Украински дронови нападнаа цели во руските области Краснодар и Белгород, тврдат локалните власти

Според тврдењата, удар на дрон предизвикал пожар во рафинерија во областа Краснодар, додека во Белгород на самата граница со Украина едно лице било рането во артилериски напад врз градот Шебекино

Еден ден откако Русија ја обвини Украина дека стои зад нападот со дронови врз Москва, гувернерот на руската област Краснодар изјави дека напад со беспилотно летало најверојатно е причината за пожарот што избувнал во нафтената рафинерија „Афипски“ во оваа област, пренесува „Гардијан“.

Пожарот, според гувернерот Вениамин Кодратјев, бил брзо изгаснат и немало жртви.

Рафинеријата „Афипски“ се наоѓа недалеку од црноморското пристаниште Новоросијск, во близина на друга рафинерија која неколкупати беше цел на напади овој месец.

Во меѓувреме и гувернерот на руската област Белгород, во близина на границата со Украина, изјави дека едно лице било рането во артилериски напад врз рускиот град Шебекино. Како и гувернерот на Краснодар, и тој го обвини Киев за нападот.

Руската област Белгород минатата недела беше нападната од диверзантски групи, кои, како што самите тврдат, се составени од руски државјани кои се борат за ослободување на Русија од режимот на Путин.  

Освен тврдењата на Москва дека нападите со беспилотни летала се оркестрирани од властите во Киев, засега нема независно и со сигурност потврдени информации кој стои зад нив.

Истовремено, Москва го зголеми интензитетот на своите ракетни и напади со беспилотни летала врз украинските градови.

Вчера едно лице загина, а четири беа повредени во руските напади со беспилотни летала врз Киев. Ноќеска, пак, според Киев, небото над Украина било релативно тивко.

Официјален Киев, како и во сите претходни случаи, вчера негираше каква било вмешаност во нападот со беспилотно летало врз Москва.

Белата куќа вчера соопшти дека Соединетите Американски Држави не поддржуваат напади внатре во Руската Федерација и дека Вашингтон ги испитува извештаите за нападите со дронови врз Москва.

„Ги видовме вестите и сè уште собираме информации за тоа што се случи. Генерално, не поддржуваме напади внатре во Русија“, рече портпаролот на Белата куќа во соопштението.