КИЕВ (АА) – Украина денес објави дека извршила 14 воздушни напади врз подрачја во кои се сконцентрирани руските сили, известува Анадолу.
„Воздухопловните сили изведоа 14 воздушни напади во текот на денот, погодувајќи подрачја во кои е стациониран непријателскиот персонал“, соопшти украинскиот Генералштаб на социјалната мрежа Фејсбук, додавајќи дека се уништени два противвоздушни ракетни системи.
Во соопштението се наведува и дека украинските рекети и артилерија во текот на денот гранатирале три контролни точки, пет магацини и три артилериски единици. Од друга страна, во соопштението се вели дека руската страна извела 43 воздушни и 4 ракетни напади, со испукани 51 ракета.
„Русија ги концентрира воените напори во правец на Лиман, Бахмут, Авдијевка и Маринка, каде во текот на денот дојде до 26 судири“, се наведува во соопштението.
Генералштабот информираше дека оперативната ситуација во Волиња и Полесија не е значително сменета, додека руските сили продолжуваат да изведуваат одбранбени операции во правец на Запорожје и Херсон.
„Руските сили дезертираат во Луганск“, се додава во соопштението.
Руските власти сѐ уште не се огласија во врска со овие тврдења.
Претседателот на Украина, Владимир Зеленски, на 10 јуни изјави дека украинската војска презема „соодветни контраофанзиви и одбранбени акции“ против Русија на првата линија на фронтот.
Извор: www.aa.com.tr
