Украина тврди дека има докази оти Русија ја уништила браната „Нова Каховка“

Службата за безбедност на Украина соопшти дека поседува телефонски разговор со кој се докажува оти руска диверзантска група ја разнела браната. Телефонскиот разговор, кој Украина тврди дека го поседува, наводно се одвива меѓу двајца војници на руски јазик разговараат за последиците од уривањето на браната.

Неколку дена по уривањето на браната „Нова Каховка“ во јужниот дел на Украина, која предизвика огромни поплави, официјален Киев тврди дека има докази оти уништувањето на браната е дело на Русија, јави Ројтерс.

Службата за безбедност на Украина денеска соопшти дека поседува телефонски разговор со кој се докажува оти руска диверзантска група ја разнела браната. Телефонскиот разговор, кој Украина тврди дека го поседува, наводно се одвива меѓу двајца војници кои на руски јазик разговараат за последиците од уривањето на браната.

„Тие (Украинците) не го погодија. Тоа беше нашата диверзантска група. Сакаа да ги исплашат луѓето со браната, но тоа не одеше според планот – направија повеќе од она што планираа“,

наводно рекол еден од луѓето, кој Службата за безбедност на Украина го опишува како руски војник.

Другиот човек на линијата, пак, изразил изненадување од тврдењето на војникот оти руските сили, кои ја окупираа браната по инвазијата на Украина во 2022 година, ги уништиле хидроелектраната и браната.

Службата за безбедност на Украина не даде дополнителни детали за наводниот разговор помеѓу руските војници, но додаде дека отворила кривична истрага за воени злосторства и за екоцид.

Браната „Нова Каховка“ во окупираниот дел на украинската област Херсон беше уништена во вторникот, за што јужната команда на украинските сили веднаш обвини дека е одговорна Русија.

• (ВИДЕО) Уништена важна брана кај Херсон, Зеленски свика итен состанок

Официјална Москва, пак, негира каква било вмешаност во овој напад и обвини оти Украина направила намерна саботажа за да се одвлече вниманието од неуспешната контраофанзива која планира да ја изврши.

• Кремљ ја обвини Украина дека намерно ја саботирала браната „Нова Каховка“ за да го одвлече вниманието од „колебливата“ контраофанзива

Уривањето на браната предизвика огромни поплави во јужниот регион Херсон што принуди евакуација на голем број луѓе од населените места. Сепак, засега не може со сигурност да се потврди кој стои зад нападот над браната.