Лекарите во Универзитетската болница во Магдебург, источна Германија, успеале да одржат во живот предвреме родено женско бебе – со тежина од само 300 грама, доволно долго, за тоа да почне да се развива, објави „Билд“.
-Детето беше на вентилатор седум недели пред да може да дише самостојно. Третманот бараше исклучително прецизен и внимателен пристап. Семејството остана в болницата долго време за да ја изгради и одржи врската со детето, а девет недели по првично проценетиот датум на раѓање, родителите конечно го зедоа девојчето дома, изјави главниот лекар Ралф Бетгер.
Болницата соопшти дека станува збор за извонреден медицински успех, бидејќи девојчето е родено 16 недели пред терминот, а тоа се смета за екстремно предвремено раѓање. Стапката на преживување кај ваквите случаи низ целиот свет е само 25 отсто.
Според Гинисовата книга на рекорди, рекордот за најмало преживеано предвреме родено бебе во светот му припаѓа на Неш Кин од САД. Тој е роден 19 недели предвреме и тежел само 283 грама. Во јули оваа година, момчето го прослави својот прв роденден. (МИА)
Извор: kurir.mk
