Твитер има намера строго да ги спроведе своите права на интелектуална сопственост и бара „Мета“ да преземе итни чекори за да престане да користи какви било трговски тајни на Твитер или други многу доверливи информации, се вели во писмото упатено до извршниот директор на „Мета“
Твитер се закани дека ќе поведе правна постапка против корпорацијата „Мета“ поради нејзината нова апликација наречена Тредс (Threads), пренесува Би-би-си.
Новата апликација Тредс беше лансирана вчера и веднаш собра повеќе од 30 милиони корисници. Тредс многу наликува на Твитер, а од шефовите на „Мета“ беше претставена како пријателска алтернатива.
Во писмото упатено до извршниот директор на „Мета“, Марк Закерберг, адвокатот кој го застапува Твитер, Алекс Спајро, ја обвинува компанијата за „систематско, намерно и незаконско присвојување на трговските тајни на Твитер и другата интелектуална сопственост“, најмувајќи поранешни вработени на Твитер заради развој на апликација со исти намени.
„Мета“, се вели во писмото од Спајро, вработиле десетици поранешни вработени на Твитер што „имале и имаат пристап до трговските тајни на Твитер и другите високо доверливи информации“ кои на крајот ѝ помогнале на „Мета“ да ја развие онаа Тредс.
„Твитер има намера строго да ги спроведе своите права на интелектуална сопственост и бара ‘Мета’ да преземе итни чекори за да престане да користи какви било трговски тајни на Твитер или други многу доверливи информации“,
се вели во писмото.
Но, од компанијата „Мета“ ги негираат ваквите тврдења, а портпаролот Енди Стоун вели дека „никој од тимот што го разви ‘Тредс’ не е поранешен вработен во Твитер“.
Од објавувањето во средата навечер, Тредс регистрира десетици милиони кориснички најавувања. Апликацијата доаѓа во време кога многу корисници на Твитер бараат алтернатива за да се ослободат од влијанието на Илон Маск врз платформата, што тој ја купи лани за 44 милијарди долари.
„Тредс“ е достапна во над 100 земји, но засега, не и во Европската Унија, каде што важат строги правила за приватност.
Извор: 360stepeni.mk
