ИСТАНБУЛ/АНКАРА (АА) – Турскиот претседател Реџеп Таип Ердоган денес ги поздрави извештаите за договорот за прекинот на огнот меѓу Израел и Иран, повикувајќи ги двете страни целосно да го почитуваат примирјето, јавува Анадолу.
„Турција решително ќе го задржи својот принципиелен став што го почитува меѓународното право и ја има дипломатијата како приоритет“, рече Реџеп Таип Ердоган на аеродромот во Анкара пред неговата посета на Холандија за самитот на НАТО, осврнувајќи се на конфликтот меѓу Израел и Иран.
„Aпсолутно се неприфатливи несовесните постапки на Израел – почнувајќи од Палестина и продолжувајќи до Либан, Сирија, Јемен и на крајот до Иран“, рече турскиот претседател.
Ердоган нагласи дека регионот не може да го носи товарот на војната меѓу Израел и Иран и повика на давање шанса на дипломатијата за да се спречи понатамошна ескалација.
Тој, исто така, рече дека што е можно поскоро мора да се воспостави траен прекин на огнот во Газа, дека израелските напади треба да престанат и дека хуманитарната помош треба да биде дозволена без прекин.
„Глобалните актери мора да преземат ефикасни чекори за да стават крај на ова лудило, или нема да биде само нашиот регион, туку целиот свет тој што ќе ја плати цената“, рече Ердоган во врска со конфликтот на Блискиот Исток.
„Во меѓувреме, во НАТО, Турција се залага за фер распределба на товарот и зајакнување на европската безбедност“, истакна тој.
Извор: Anadolu Agency (AA)
