ГАЗИАНТЕП (АА) – Претседателот на Република Туркије, Реџеп Таип Ердоган, денеска изјави дека властите на земјата стојат зад дадените ветувања и продолжуваат со големите проекти за изградба на објектите урнати во разорниот земјотрес што погоди 11 турски области на 6 февруари 2023 година, јавува Анадолу.
На собир во Газиантеп, Ердоган присуствуваше на примопредавањето на клучевите од 5.113 новоизградени станбени единици на семејствата кои останаа без покрив над главата во земјотресот, кој го опиша како „катастрофа на столетието“.
„Застанавме покрај нашата нација во катастрофата на столетието. Брзо ја започнавме изградбата на столетието. Минатата недела ги предадовме клучевите од нашите 155.000 куќи во Кахраманмараш“, рече Ердоган.
Турскиот претседател истакна дека Туркије мора да биде силна на сите полиња ако сака да живее во траен мир и просперитет во Анадолија, и дека тоа вклучува изградба на силни и отпорни градови.
„Оваа земја стана име на судбината, верувањето, борбата. Ова подрачје, каде секој ветер раскажува приказна, не е обична земја. Ова е татковината на оние кои го обликуваат светот. Ако сакаме да им оставиме просперитетна земја на нашите деца, мораме да ги држиме нозете цврсто на земја. Не можеме да дозволиме нашата прекрасна татковина да биде жртва“, порача Ердоган.
Тој рече дека до крајот на оваа година во сите 11 турски области погодени од земјотресот ќе бидат врачени клучевите од 201.688 новоизградени станбени и деловни единици, вклучително и 24.191 таков простор во Газиантеп.
„До крајот на 2025 година ќе испорачаме 31.317 станбени и деловни единици во Газиантеп и 452.983 такви единици низ зоните на земјотресот“, истакна Ердоган.
Турскиот претседател најави дека Туркије го продолжува патот на прогресот и растот, спроведувајќи мегапроекти како што е изградбата на брзата железничка пруга Газиантеп-Османије-Инџирлик-Адана-Мерсин.
Извор: Anadolu Agency (AA)
