ИСТАНБУЛ (АА) – Турската Република Северен Кипар (ТРСК) наскоро ќе го заземе местото што го заслужува на меѓународната сцена, изјави денес турскиот потпретседател при посетата на земјата, јавува Анадолу.
„Верувам дека ТРСК и кипарските Турци, како суверена држава и нација, наскоро ќе го заземат заслуженото место на меѓународната сцена, во рамките на меѓународното право“, рече Џевдет Јилмаз на прес-конференција во Лефкоша, главниот град на ТРСК, при неговата прва посета по преземањето на функцијата.
„Веќе ја продолжуваме нашата работа во консензус и единство на срцата во овој поглед“, додаде тој.
Јилмаз беше придружуван од Ерсин Татар, претседателот на ТРСК.
Јилмаз додаде дека кипарските Турци постепено ќе ги надминат ембаргата над нив и ќе ја прифатат глобалната поврзаност.
„Кипарските Турци се соочуваат со овие неправедни ембарга речиси 50 години, но сите овие проблеми ќе ги надминеме заедно“, рече Јилмаз.
Тој го нарече прифаќањето на ТРСК во Организацијата на туркиските држави како држава набљудувач „вреден чекор“, што е значаен „показател за политиката на две држави на Туркије“.
„Верувам дека ТРСК ќе напредува политички, воено, економски и социолошки. Ќе продолжиме да ги поддржуваме кипарските Турци со сите наши институции и организации“, нагласи тој.
Јилмаз истакна дека Туркије ќе продолжи да се залага за дводржавно решение за Кипар, нагласувајќи дека решение може да се изгради само врз реалноста на островот, што ќе придонесе за регионалната стабилност и просперитет.
„Решавањето на кипарското прашање на праведен, траен и одржлив начин, обезбедувајќи ги легитимните права и безбедноста на кипарските Турци, е еден од најважните приоритети на нашата земја. Никогаш не сме отстапиле од преговарачката маса во потрага по решение, но нашата политика е јасна и отворена: ние сме секогаш отворени за решение засновано врз дводржавна рамка“, истакна тој.
Јилмаз изјави дека Туркије е решена да ги заштити територијалните права и интереси на кипарските Турци во источниот Медитеран.
Извор: www.aa.com.tr
