ИСТАНБУЛ (АА) – Турскиот министер за надворешни работи, Хакан Фидан, утре (недела) ќе присуствува на состанокот за Сирија во главниот град на Саудиска Арабија, Ријад, соопштија дипломатски извори, јавува Анадолу.
На состанокот ќе продолжат разговорите од претходниот собир во Акаба, Јордан, истакнаа изворите.
Фидан го посети Јордан на 14 декември минатата година за состанокот за Сирија, каде оствари средба и со неговиот јордански колега Ајман Сафади.
Состанокот во Ријад ќе се фокусира на стабилноста на Сирија, на кој се очекува Фидан да ја истакне важноста на територијалниот интегритет и единство на земјата, потребата од систематски чекори за нејзина обнова и потенцијално проширување на изземањето од санкциите.
На состанокот ќе присуствуваат и министрите за надворешни работи на Сирија и членките на Советот за заливска соработка – Саудиска Арабија, Обединетите Арапски Емирати, Катар, Кувајт, Бахреин и Оман – заедно со министрите за надворешни работи на Ирак, Либан Јордан, Египет, Велика Британија и Германија.
Се очекува САД и Италија да бидат претставени од замениците министри за надворешни работи.
На состанокот најверојатно ќе присуствуваат и високата претставничка на Европската Унија за надворешни работи и безбедносна политика, генералниот секретар на Арапската лига, генералниот секретар на Советот за заливска соработка и специјалниот пратеник на ОН за Сирија.
На 1 јануари, новите лидери на Сирија ја остварија својата прва официјална посета во странство и тоа во Саудиска Арабија, на помалку од еден месец по соборувањето на поранешниот лидер на сирискиот режим Башар ал-Асад на 8 декември.
Извор: Anadolu Agency (AA)
