ИСТАНБУЛ (АА) – Турскиот министер за надворешни работи Хакан Фидан ќе ја посети Украина на 29 и 30 мај на покана на украинскиот колега Андриј Сибиха, соопштија дипломатски извори, јавува Анадолу.
Се очекува Фидан да се состане со украинскиот претседател Владимир Зеленски и премиерот Денис Шмихал, како и да одржи билатерални средби со високи функционери, меѓу кои и со Сибиха, шефот на претседателската канцеларија на Украина, Андриј Јермак, како и со министерот за одбрана Рустем Умеров, кој ја предводеше украинската делегација во директните преговори со Русија одржани во Истанбул на 16 мај 2025 година, додадоа изворите.
За време на состаноците турскиот министер ќе разговара за чекори што може да се преземат за унапредување на билатералните односи, особено во областа на трговијата, енергетиката, одбраната и безбедноста, во рамките на соработката што е воспоставена врз основа на стратегиското партнерство меѓу Анкара и Киев.
Фидан ќе ја повтори поддршката на Турција за територијалниот интегритет, суверенитетот и независноста на Украина.
Исто така, ќе укаже на сè посериозните негативни последици од војната меѓу Русија и Украина, потенцирајќи ја неопходноста од завршување на конфликтот преку дипломатија и потребата од обезбедување праведен и одржлив мир.
Во таа насока се очекува Фидан да ја изрази подготвеноста на Турција повторно да даде свој придонес, како што тоа го прави и досега и да биде домаќин на следните преговори меѓу Киев и Москва.
Тој ќе ја искаже и подготвеноста на Анкара да игра улога во обновата на Украина и ќе ја нагласи важноста на безбедноста на пловидбата по Црно Море.
Покрај билатералните прашања, на средбите ќе се разговара и за регионални и глобални теми.
Се очекува Фидан да се сретне и со припадниците на кримските Татари и Гагаузите, особено со националниот лидер на кримските Татари и пратеник во украинскиот Парламент, Мустафа Џемилев, како и со претседателот на Народното собрание на кримските Татари, Рефат Чубаров.
– Меѓусебни посети на високо ниво, трговска размена меѓу Турција и Украина –
Посетите на ниво на министри за надворешни работи меѓу Турција и Украина продолжуваат со континуиран интензитет.
Фидан последен пат оствари билатерална посета на Украина на 25 август 2023 година.
Сибиха, пак, последен пат ја посети Турција на 21-22 октомври 2024 година, а учествуваше и на Форумот за дипломатија во Анталија што се одржа од 11 до 13 април 2025 година.
На 14 мај Фидан и Сибиха се сретнаа во Анталија на маргините на неформалниот состанок на министрите за надворешни работи на НАТО.
Покрај министерските посети, во последно време се бележи значително зголемување на официјалните посети од Украина на Турција на сите нивоа.
Украинскиот претседател Зеленски ја посети Турција на 8 март 2024 година, како и на 17-18 февруари и на 15-16 мај годинава.
Покрај него, претседателот на украинскиот Парламент (Врховна Рада), Руслан Стефанчук, беше во посета на Турција од 13 до 15 мај 2024 година, министерот за одбрана Умеров на 14 мај 2024 година, а шефот на претседателскиот кабинет Јермак, заедно со Умеров, на 28 јуни 2024 година.
Покрај посетите на високо ниво, трговската размена меѓу двете земји во 2024 година изнесуваше 6,2 милијарди долари и покрај негативните последици од војната меѓу Русија и Украина.
Извор: Anadolu Agency (AA)
