АНКАРА (АА) – Туркије ќе го направи својот дел да „помогне во олеснувањето на тешкиот пат“ кој му претстои на сирискиот народ, изјави денес турскиот министер за надворешни работи, Хакан Фидан, јавува Анадолу.
Фидан присуствуваше на состанокот за иднината на Сирија во саудискиот главен град Ријад, заедно со министрите за надворешни работи на Саудиска Арабија, Сирија, Бахреин, Египет, Ирак, Јордан, Кувајт, Либан, Оман, Катар и Обединетите Арапски Емирати, соопшти турското Министерство за надворешни работи на платформата X.
Новата сириска администрација предводена од Ахмед ал-Шара го презеде раководството во Сирија по соборувањето на Башар ал-Асад минатиот месец. Таа повика на укинување на санкциите со цел да се опорави од речиси 14-годишната граѓанска војна.
Фидан истакна дека ако Сириските демократски сили (СДФ) се искрени во своите напори да се интегрираат во централната сириска влада, треба да го објават своето распуштање.
Тој нагласи дека зачувувањето на територијалниот интегритет и суверенитет на Сирија мора да остане „примарен фокус“.
СДФ е предводена од ЈПГ, сирискиот огранок на терористичката организација ПКК.
Во својата 40-годишна терористичка кампања против Туркије, ПКК, којашто е ставена на листата на терористички организации од страна Туркије, САД и ЕУ, е одговорна за смртта на над 40.000 луѓе, меѓу кои и деца, жени и постари лица.
Фидан повтори дека терористичката организација продолжува да претставува сериозна закана за арапското мнозинство во подрачјето источно од Еуфрат во Сирија, и ги искористува природните ресурси што му се најпотребни на сирискиот народ.
„Можеме да работиме заедно за да го зајакнеме капацитетот на новата влада за ефикасна борба против ДЕАШ. Како Туркије, ние сме подготвени да го дадеме нашиот дел за да помогнеме во олеснувањето на тешкиот пат кој претстои пред сирискиот народ“, додаде турскиот министер.
– „Регионалните земји имаат ‘најголема одговорност’ за иднината на Сирија“ –
Шефот на турската дипломатија истакна дека земјите од регионот имаат „најголема одговорност“ во управувањето со случувањата во Сирија и потврди дека територијалниот интегритет, единство и суверенитет на земјата остануваат основни принципи кои ги водат нивните напори.
Тој рече дека знаците за нормализација во Сирија секој ден стануваат сѐ посилни, додавајќи: „Во овој клучен период, ние мора да дејствуваме како балансирачка сила, внимателно усогласувајќи ги очекувањата на меѓународната заедница со реалноста со која се соочува новата администрација на Сирија.“
Фидан нагласи дека напорите за поддршка на Сирија би можеле да бидат поефикасни со воспоставување механизам или комисии за координација, и ја нагласи потребата од идентификување на приоритетните сектори за да се направат повеќе исклучоци од санкциите во иднина.
По арапскиот министерски состанок следува меѓународна средба на која ќе учествуваат и шефовите на дипломатиите на Туркије, Велика Британија и Германија. Се очекува САД и Италија да учествуваат на ниво на заменици министри за надворешни работи.
Извор: Anadolu Agency (AA)
