ХАТАЈ/АНКАРА (АА) – Турскиот министер за национална одбрана Хулуси Акар остро го осуди повторувањето на нападот врз светата книга на муслиманите, Куранот, и турското знаме во Данска, јавува Анадолу.
„Најостро ги осудуваме оние што го извршија овој арогантен и одвратен напад, дехуманизирани и разбеснети со омраза, ги прогласуваме и ги осудуваме за соучесници оние што замижуваат пред овие шарлатани останувајќи бесчувствителни и во молк, и речиси ги поттикнуваат на злосторство оставајќи ги неказнети“, рече Акар во турската јужна област Хатај.
Неговата изјава дојде откако турското Министерство за надворешни работи го повика данскиот амбасадор во Анкара, Дани Анан, да им укаже на данските власти да ги преземат неопходните мерки против сторителите на ова злосторство и да применат ефективни мерки за да се спречи повторување на вакви провокации.
Акар нагласи дека овој „непријателски, варварски менталитет и дејства“, кои неодамна се зголемија во Европа, ги уништуваат демократските вредности и културата на толеранција и мирен соживот.
Денес турското Министерство за национална одбрана соопшти дека „и покрај сите предупредувања и иницијативи, ова злосторство од омраза извршено против целото човештво во Данска уште еднаш остана неодговорно да се набљудува отстрана во име на таканаречената демократија и слобода на изразување“.
„Ја повикуваме Данска, која исто така е членка на НАТО, веднаш да го напушти својот неодговорен однос кон ваквите напади, кои ги загрозуваат заедничките вредности на целото човештво и кои се уште една манифестација на тероризам и веднаш да го направи она што е потребно во име на целото човештво“, се вели во соопштението на Министерството.
Исто така, ги покани сите бранители на демократијата и човековите права, особено оние во Данска, да дејствуваат во име на универзалните хуманитарни вредности.
Последните месеци имаше неколку чинови на палење на Куранот, или обиди за тоа, од исламофобични индивидуи или групи во Северна Европа и нордиските земји.
Извор: www.aa.com.tr
