АНКАРА (АА) – Турската разузнавачка служба, (МИТ) неутрализираше високорангиран терорист на ПКК во северен Ирак, соопштија денес безбедносни извори, пренесува Анадолу.
Кадри Енџу, со кодно име Доган, неутрализиран е во ирачкиот регион Гара, соопштија извори кои сакаа да останат анонимни, бидејќи не се овластени да разговараат со медиуми.
Енџу го отвораше патот за терористичките групи во регионите Гара, Зап, Метина и Хафтанин во северен Ирак, со цел изведување напади на подрачјата опфатени со антитерористичката операција „Канџа“.
Од безбедносни извори се дознава дека Енџу бил таканаречен ирачко-сириски офицер на терористичката ПКК, кој ѝ се приклучил на терористичката организација во 2006 година, а се обучувал во регионот Зап.
Тој бил телохранител на Дуран Калкан, со кодно име Абас, и бил член и на таканаречениот извршен совет на ПКК во периодот од 2015 до 2017 година. Заминал за Гара во јануари 2018 година, информираа безбедносните извори.
Освен своите курирски должности, Енџу бил вклучен и во активностите на единицата за надворешни односи на терористичката ПКК и организирал трансфер на терористи и оружје на ПКК во рамките на Ирак и меѓу Ирак и Сирија.
Туркије започна низа операции против ПКК во северниот дел на Ирак во 2020 година, а операцијата „Канџа-катанец“ стартуваше во април минатата година, со цел уништување на засолништата на терористите на ПКК во северниот дел на Ирак, особено во подрачјата Метина, Зап и Авасин-Басјан.
Претходно турските вооружени сили ги започнаа операциите „Канџа-тигар“ и „Канџа-орел“ во 2020 година со цел да ја осигураат безбедноста на турскиот народ и границите на својата земја, неутрализирајќи ја заканата од ПКК и останатите терористички групи кои го користат северен Ирак како центар за планирање прекугранични напади во Туркије.
ПКК е сепаратистичка организација коа се наоѓа на листата на терористички организации во Туркије, Европската унија и во САД. Во текот на повеќедецениската терористичка кампања против Туркије, терористите на ПКК убија над 40.000 луѓе.
