АНТАЛИЈА (АА) – Израелскиот фудбалер на Анталијаспор, Сагив Јехезкел, кој беше приведен откако на натпреварот во турската Суперлига прослави гол давајќи му поддршка на Израел, во контекст на израелските напади врз Газа, беше ослободен по сослушувањето во Обвинителството, јавува Анадолу.
Во Обвинителството во Анталија заврши сослушувањето на израелскиот фудбалер кој утринава беше приведен во истрагата што ја поведе Основното јавно обвинителство поради сомнение дека сторил казнено дело „поттикнување на јавноста на омраза и непријателство“. По сослушувањето, Јехезкел е ослободен.
Крилниот играч на Анталијаспор, Јехезкел, претходно е исклучен од составот на турскиот фудбалски клуб поради неговото произраелско прославување на голот на ремито против Трабзонспор вчера.
Потпретседателот и портпарол на турскиот клуб, Еврен Алкан, рече дека адвокатите на Анталијаспор работат на раскинување на договорот со Јехезкел.
Откако постигна гол против Трабзонспор, Јехезкел сподели порака за солидарност со Израел со кревање на раката во завој. Пораката се однесува на нападот на палестинската група на отпорот, Хамас, на 7 октомври и 100 дена израелски напади врз Газа. Завојот имаше Давидова ѕвезда што го симболизира еврејскиот идентитет.
Се огласи и турскиот министер за правда, Јилмаз Тунч, кој изјави дека истрагата е поведена „поради лошата постапка на фудбалерот со која го поддржа израелскиот масакр во Газа по постигнувањето гол, за поттикнување на јавноста на омраза и непријателство“.
Фудбалската федерација на Туркије го осуди како „целосно неприфатливо однесувањето“ на Јехезкел, а против одговорните беше поведена дисциплинска истрага.
Во меѓувреме, истанбулскиот клуб Башакшехир поведе дисциплинска истрага против израелскиот фудбалер Еден Карзев поради слични пораки на социјалните мрежи.
Извор: Anadolu Agency (AA)
