ВАШИНГТОН (АА) – Туркије и Ирак потпишаа 26 договори во различни области во текот на вчерашната посета на претседателот Реџеп Таип Ердоган на главниот град Багдад, јавува Анадолу.
Ердоган го посети Ирак првпат по 13 години на разговори за билатералните односи, борбата против тероризмот и регионалните прашања, вклучително и тековната израелска војна во Појасот Газа.
По средбата на Ердоган со ирачкиот премиер Мухамед Шија ал Судани беа потпишани вкупно 26 договори меѓу двете земји.
Беше потпишан меморандум за разбирање за проектот „Развоен пат“ меѓу Туркије, Ирак, Катар и Обединетите Арапски Емирати (ОАЕ).
Договорот, чија цел е да се воспостави автопат и железница во должина од 1.200 километри, беше потпишан од министрите за транспорт во присуство на Ердоган и Ал Судани.
Проектот „Развоен пат“ опфаќа железнички линии и автопатишта што се протегаат од големото пристаниште Ал Фав во Басра преку градовите Диванија, Наџаф, Карбала, Багдад и Мосул до турската граница, со цел да се обезбеди пристап од турската граница до пристаништето Мерсин и понатаму кон Европа преку Истанбул по копнени патишта.
Турскиот министер за транспорт и инфраструктура Абдулкадир Уралоглу рече дека проектот ќе отвори „нова врата“ во однос на регионалната трговија.
„Проектот ‘Развоен пат’, кој директно ќе придонесе за глобалниот трговски систем, исто така, ќе биде од корист за развојот на сите земји учеснички“, истакна Уралоглу на X.
Туркије и Ирак потпишаа договори во областите на енергетиката, трговијата, образованието, туризмот, спортот, здравството и одбраната за зајакнување на билатералната соработка.
За време на посетата Ердоган во Ербил се сретна и со претседателот Нечирван Барзани и со премиерот Масрур Барзани од ирачката регионална курдска Влада.
Извор: Anadolu Agency (AA)
