Најверојатно „црната листа“ на САД ќе биде проширена со нови имиња од земјава. Американската амбасадорка Анџела Агелер вели дека во Вашингтон постојано се разгледуваат имињата кои може да се најдат на оваа листа. Американската „црна листа“ последен пат доби нови имиња во март годинава кога на неа се најде градоначалникот на Карпош Стевче Јакимовски и поранешната специјална обвинителка Катица Јанева. Листата е отворена за дополнување, рече Агелер.
„Листата е многу динамична, постојано се проверуваат имиња и се дискутира за нив. Немам временска рамка бидејќи тоа е одлука на Вашингтон, но можам да ве уверам дека додека зборуваме голем број имиња се проверуваат и секогаш е можно да се додадат нови имиња. Така што ќе дознаете кога тоа ќе се случи“, вели Анџела Агелер.
Агелер ова го изјави на првата Конференција за борба против корупцијата во Западен Балкан, на која таа потенцираше дека корупцијата е проблем кој сериозно го зафатил регионот. Таа најави дека во Македонија ќе се инсталира правосудна мрежа составена од професионалци кои ќе се ангажираат во борбата против корупцијата.
„Ние можеме заедно да ја изградиме мрежата за борба против корупција од позиција на сила и доверба. Воодушевена сум да објавам дека формирањето на новата правосудна мрежа во Северна Македонија која ќе ги здружи професионалните од к ривично правнио сектор кои ќе с поделуваат искуства, ќе поттикнуваат доверба и ќе се поддржуваат едни со други во работата“, додаде Анџела Агелер.
Арбен Фетаи вицепремиер за добро владеење, истакна дека Македонија се соочува со критичен предизвик, бидејќи корупцијата ја има во секој агол на нашето општество.
„Како држава, Северна Македонија се соочува со критичен предизвик откако корупцијата ја има во секој агол на нашето општество, заканувајќи му се на владеењето на правото, дестабилизација на општественото ткиво и еродирање на демократските вредности. Социјалната сигурност на нашите граѓани и интегритетот на институциите се под закана. И ние не смееме да дозволиме ова да продолжи“, вели Арбен Фетаи.
Инаку во однос на упадот на членовите на судскиот и обвинителскиот совет во Управниот одбор на Академијата за судии и обвинители, амбасадорката Агелер рече дека јавноста мора да ги дознае сите детали што се кријат зад овој случај.
ИЗВОР: ТВ 21
