ГАЗА (АА) – Дирекцијата за цивилна одбрана во Појасот Газа објави дека кризата со гориво предизвикана од континуираните напади и блокада на Израел, го парализирала нејзиниот капацитет за реагирање во вонредни ситуации, а 75 % од возилата за цивилна одбрана се надвор од употреба поради недостаток на гориво, известува Анадолу.
Во писменото соопштение на Дирекцијата за цивилна одбрана во Газа се вели: „75 % од нашите возила не работат бидејќи нема гориво“.
Во соопштението се нагласува дека има голем проблем и со електричниот генератор и уредот за кислород.
Појасот Газа се соочува со длабока хуманитарна криза откако Израел ги затвори граничните премини на 2 март, со што се запре протокот на храна, лекови и хуманитарна помош.
Според извори од палестинската Влада во Газа, во регионот владее широко распространета глад, а бројот на смртни случаи предизвикани од неисхранетост се зголеми на 57. Поголемиот дел од оние што умираат од глад се деца.
Според податоците на Светската банка, 2,4 милиони Палестинци кои живеат во Газа, каде што сиромаштијата значително се продлабочи како резултат на израелските напади во последните 20 месеци, станале речиси целосно зависни од странска помош.
– Прекршувајќи го прекинот на огнот, израелската Армија одново ги започна нападите врз Газа
По прекинот на огнот што стапи на сила на 19 јануари во Појасот Газа, израелската Армија ги продолжи своите насилни напади утрото на 18 март.
Откако израелската Армија ги обнови нападите, убиени се 2.545 Палестинци, претежно постари лица, жени и деца, а 6.856 се повредени.
Бројот на Палестинци кои ги загубија животите во израелските напади врз Појасот Газа од 7 октомври 2023 година изнесува 52.653, а бројот на повредени изнесува 118.897.
Израел, кој го прекрши примирјето, објави дека ќе дејствува со „зголемување на воената сила“ против Хамас, бидејќи ги отфрли новите предлози за примирје.
Извор: Anadolu Agency (AA)
