Операцијата започнала околу еден часот по полноќ со воздушен напад врз зграда што ја користеле екстремистите, а целта била да се конфискува и уништи нивното оружје, вели портпаролот на израелската војска
Најмалку тројца Палестинци се убиени денеска кога израелски беспилотни летала нападнале бегалски камп во Џенин на северот од окупираниот Западен Брег, објави Би-би-си. Палестинското Министерство за здравство соопшти дека во нападот се повредени повеќе од 20 Палестинци.
Израелските одбранбени сили (ИДФ) соопштија дека ја напаѓаат терористичката инфраструктура во областа Џенин.
„Нема само да чекаме додека терористите продолжуваат да им нанесуваат штета на цивилите користејќи го кампот Џенин како скривалиште“,
велат од ИДФ, додавајќи дека кампот е „терористичко упориште“.
Потполковникот Ричард Хехт, портпарол на израелската војска, изјави дека операцијата започнала околу еден часот по полноќ со воздушен напад врз зграда што ја користеле екстремистите, а целта била да се конфискува и уништи нивното оружје.
Тој објасни дека во операцијата учествувале околу 2 000 војници и дека воените беспилотни летала извршиле серија напади за да им го расчистат патот на копнените сили.
Иако Израел изврши изолирани воздушни напади на Западниот Брег во последните недели, Хехт вели дека денешните напади претставуваат ескалација што не е забележана од 2006 година, кога заврши палестинскиот бунт.
Палестинските медиуми пренесуваат дека армијата ги блокирала патиштата во кампот, заземала позиции на куќи и згради и поставила снајперисти на покривите.
Баталјонот Џенин, во кој членуваат вооружени членови на палестинските групи Фатах, Хамас и Исламски џихад, најавија дека „ќе се борат против окупациските сили до последниот здив и куршум“, како и дека ќе работат заедно и обединети од сите фракции и воени формации.
„Она што се случува во бегалскиот камп е вистинска војна“,
вели за Ројтерс палестински возач на брза помош, Калед Алахмад, додавајќи дека секогаш кога се враќаат од кампот амбулантните возила се полни со повредени.
Извор: 360stepeni.mk
