Тројца катарски дипломати загинаа во тешка сообраќајна несреќа во Египет, објави Асошиејтед Прес (АП), повикувајќи се на официјални лица во Каиро.
Жртвите биле членови на протоколарната служба на катарското Министерство за надворешни работи, пренесува агенцијата. Нивниот автомобил се судрил со камион на околу 50 километри од Шарм ел Шеик, додека патувале кон египетското одморалиште каде што е закажан меѓународен самит за прекин на огнот во Појасот Газа за 13 октомври.
Хамас изрази сочувство до Катар поради трагедијата и ги пофали, како што е наведено, „напорите на Доха за посредување за прекин на конфликтот во Газа“.
Несреќата се случи во пресрет на спроведувањето на новиот договор за прекин на огнот меѓу Израел и Хамас, кој стапи на сила напладне по локално време на 10 октомври. Договорот е резултат на дипломатските иницијативи на американскиот претседател Доналд Трамп, вклучувајќи го и неговиот мировен план од 20 точки за стабилизирање на регионот.
Извор: tv21
