Вооружените сили, во соработка со други оперативни сили на терен и со помош на Европскиот механизам за цивилна заштита, ги ставија под контрола големите пожари кои со денови беснееја во три подрачја во Албанија, соопшти Министерството за одбрана.
-Во општина Финиќ, на југот на земјата нашето воздухопловство, потпомогнато од два канадера од Грција, во рамките на Европскиот механизам за цивилна заштита, успеа да го стави пожарот под контрола во планинскиот масив Штугар и во прекуграничната област, стои во соопштението.
Тесната координација помеѓу Националниот центар за операции во вонредни ситуации (AKMC) и грчката Агенција за цивилна заштита им овозможи на грчките авиони да влезат на граничниот премин и ефикасно да ја извршат мисијата. Во моментов, ситуацијата во Финиќ е под контрола.
Според министерството под контрола се и пожарите кај Елбасан и Поличан.
– Ги повикуваме граѓаните да покажат зголемена претпазливост, да не палат пожари во природа и веднаш да ги известат надлежните структури во случај на опасност. Сите структури за цивилна заштита се во целосна готовност, во секој случај на потреба“, се наведува понатаму во соопштението на Министерството за одбрана.
Во Албанија во просек дневно се интервенира на најмалку десеттина пожари на отворен простор. Минатата година во земјата биле евидентирани над 1.100 пожари.
Извор: kurir.mk
