Администрацијата на американскиот претседател Доналд Трамп објави дека ќе им наплаќа на компаниите 100.000 долари годишно за привремени H-1B визи, потег што би можел да нанесе сериозен удар на технолошкиот сектор кој во голема мера се потпира на квалификувани работници од Индија и Кина.
Откако се врати во Белата куќа во јануари, Трамп воведе низа антиимиграциски мерки, од кои некои имаа за цел ограничување на одредени форми на легална имиграција во САД. Најавената реформа на програмата за визи H-1B е најзначајниот обид на администрацијата на Трамп да го ревидира системот за привремени работни визи досега.
„Ако ќе обучувате некого, тоа ќе биде некој што неодамна дипломирал на еден од големите универзитети низ нашата земја. Обучете ги Американците. Престанете да носите луѓе што ни ги земаат работните места“, рече министерот за трговија Хауард Лутник.
Некои работодавци ја искористиле програмата за привремени работни визи за да ги намалат платите, штетејќи им на американските работници, според извршната наредба потпишана од Трамп во петокот.
Бројот на странски работници во областите на науката, технологијата, инженерството и математиката (STEM) во Соединетите Американски Држави се зголеми повеќе од двојно од 2000 до 2019 година, на речиси 2,5 милиони, додека вкупната вработеност во STEM порасна за само 44,5 проценти во истиот период, се вели во документот.
„Цената на визата, која ќе важи три години, ќе биде 100.000 долари годишно“, рече Лутник, додавајќи дека владата сè уште ги „разработува“ специфичните детали за тоа како ќе се спроведуваат таксите. Новите такси би можеле да додадат милиони долари на трошоците на компаниите, особено силно погодувајќи ги помалите технолошки компании, забележува Ројтерс.
Некои аналитичари предвидуваат дека воведувањето на данокот би можело да ги принуди некои компании да преместат дел од своите операции со висока вредност во странство и следствено да ги попречи САД во трката за првото место во секторот за вештачка интелигенција.
Најголем број привремени работни визи, дури 71 процент, им беа доделени на работници од Индија минатата година, додека кинеските државјани се на второто место, со удел од 11,7 проценти, според официјалните податоци од САД.
Во однос на бројот на доделени визи, технолошките компании се водечки. На пример, на Амазон му беа доделени 12.000 барања за привремени работни визи во првата половина од 2025 година, додека на Мајкрософт и Мета им беа доделени по 5.000 вакви визи. Лутник рече дека сите големи компании се согласуваат со воведувањето на новата такса.
Извор: tv21
