Министерот за здравство, Азир Алиу, најави укинување на дискреционото право на директорите на болници да вработуваат лекари од партиски списоци. Ова право редовно се злоупотребуваше, при што, и покрај официјалните конкурси и рангирања, директорите си ги вработуваа кандидатите од партиските листи.
Алиу во интервју за Агенда 35 на МРТВ истакна дека лично е против оваа практика и дека новите законски измени ќе го отстранат овој дискреционен елемент, со цел процесот на вработување да биде транспарентен и меритократски. „Докторот или медицинската сестра кои ќе бидат вработени, ќе бидат избрани според заслуги, а не според политичка припадност“, рече министерот.
Тој истакна дека и покрај можниот политички притисок, Владата е решена здравството да остане департизирано, бидејќи сите граѓани се потенцијални пациенти и професионализмот во системот е клучен.
Оваа иницијатива е резултат на повеќегодишна акција на граѓански организации и здруженија на млади лекари, кои преку дебати и интервјуа ги истакнаа проблемите со партискиот клиентелизам во здравствениот систем. Укинувањето на дискреционото право се смета за клучен чекор кон департизација и подобрување на квалитетот на здравствените услуги во Македонија.
